ആലത്തൂര്‍: ക്ഷീര വികസന വകുപ്പ്, ജില്ലയിലെ ക്ഷീര സംഘങ്ങള്‍, മില്‍മ, കേരള ഫീഡ്സ് എന്നിവയുടെ സംയുക്താഭിമുഖ്യത്തില്‍ ജില്ലാ ക്ഷീരകര്‍ഷക സംഗമം നവംബര്‍ 29, 30, ഡിസംബര്‍ ഒന്ന് തീയതികളിലായി അഞ്ചുമൂര്‍ത്തി ക്ഷീരോല്‍പ്പാദക സഹകരണസംഘം പരിസരം, ആലത്തൂര്‍ ബ്ലോക്ക് പഞ്ചായത്ത് ഹാള്‍, വള്ളിയോട് തേവര്‍ക്കാട് കണ്‍വെന്‍ഷന്‍ സെന്റര്‍ എന്നിവിടങ്ങളില്‍ നടക്കും.
കന്നുകാലി പ്രദര്‍ശനം ഇന്ന്
ജില്ലാ ക്ഷീരകര്‍ഷക സംഗമത്തിനോടനുബന്ധിച്ച് അഞ്ചുമൂര്‍ത്തി ക്ഷീരോല്‍പ്പാദക സഹകരണസംഘം പരിസരത്ത് നടക്കുന്ന കന്നുകാലി പ്രദര്‍ശനം ഇന്ന് (നവംബര്‍ 29) രാവിലെ ഒമ്പതിന് കെ.ഡി.പ്രസേനന്‍ എം.എല്‍.എ ഉദ്ഘാടനം ചെയ്യും. ആലത്തൂര്‍ ബ്ലോക്ക് പഞ്ചായത്ത് വൈസ് പ്രസിഡന്റ് വി.ഹേമലത അധ്യക്ഷയാകും. പ്രതിരോധ കുത്തിവെയ്പ് എടുത്ത ഉരുക്കളെ മാത്രമേ പ്രദര്‍ശനത്തില്‍ പങ്കെടുക്കാനൂ.
രാവിലെ 10 ന് അഞ്ചുമൂര്‍ത്തി ക്ഷീരസംഘം ഹാളില്‍ ഡെയറി ക്വിസ് നടത്തും. ക്ഷീരവികസന ഓഫീസര്‍മാര്‍, ഡയറി ഫാം ഇന്‍സ്ട്രക്ടര്‍മാര്‍ എന്നിവര്‍ ക്വിസ് നയിക്കും. തുടര്‍ന്ന് ക്ഷീരസംഘം ജീവനക്കാര്‍ക്കുള്ള ശില്പശാല വി.ടി.ബല്‍റാം എം.എല്‍.എ ഉദ്ഘാടനം ചെയ്യും. ക്ഷീരസഹകരണ മേഖലയിലെ നേതൃത്വപാഠവം, വ്യക്തിത്വ വികസനം- കാലഘട്ടത്തിന്റെ അനിവാര്യത എന്ന വിശയത്തില്‍ തിരുവനന്തപുരം കെ.ഐ.സി.എം.എ ട്രെയിനിങ് ഫാക്കല്‍റ്റി പാട്രിക്ക് എം. കല്ലട ക്ലാസെടുക്കും. വിദ്യാര്‍ത്ഥികള്‍ക്കുള്ള മത്സരങ്ങള്‍ 30 ന്
ജില്ലാ ക്ഷീരകര്‍ഷക സംഗമത്തിനോടനുബന്ധിച്ച് സ്‌കൂള്‍ വിദ്യാര്‍ഥികള്‍ക്കുള്ള ചിത്രരചന, പ്രബന്ധരചന, പ്രശ്നോത്തരി മത്സരങ്ങള്‍ എന്നിവ നവംബര്‍ 30 ന് ആലത്തൂര്‍ ബ്ലോക്ക് പഞ്ചായത്ത് ഹാളില്‍ രാവിലെ ഒമ്പതിന് നടത്തും. ആലത്തൂര്‍ ബ്ലോക്ക് പഞ്ചായത്ത് വികസന കാര്യ സ്റ്റാന്റിംഗ് കമ്മിറ്റി ചെയര്‍മാന്‍ ടി.വാസു ഉദ്ഘാടനം ചെയ്യും. രാവിലെ 10 മുതല്‍ 11 വരെ ചിത്രരചന, പ്രബന്ധരചന എന്നിവയും, 11 മുതല്‍ 12 വരെ പ്രശ്നോത്തരി മത്സരവും നടക്കും.
ഡയറി എക്സ്പോ, ക്ഷീരവികസന സെമിനാര്‍, പൊതുസമ്മേളനം ഒന്നിന്
ജില്ലാ ക്ഷീരകര്‍ഷക സംഗമത്തിന്റെ ഭാഗമായി ഡിസംബര്‍ ഒന്നിന് വടക്കഞ്ചേരിയിലെ വള്ളിയോട് തേവര്‍ക്കാട് കണ്‍വെന്‍ഷന്‍ സെന്ററില്‍ സംഘടിപ്പിക്കുന്ന ഡയറി എക്സ്പോ കണ്ണമ്പ്ര ഗ്രാമപഞ്ചായത്ത് പ്രസിഡന്റ് റെജിമോന്‍ ഉദ്ഘാടനം ചെയ്യും. തുടര്‍ന്ന് നടക്കുന്ന ക്ഷീരവികസന സെമിനാര്‍ ആലത്തൂര്‍ ബ്ലോക്ക് പഞ്ചായത്ത് പ്രസിഡന്റ് സി.കെ.ചാമുണ്ണി ഉദ്ഘാടനം ചെയ്യും. ‘ക്ഷീരവികസനം ഉപതൊഴിലല്ല പ്രധാന വരുമാനമാര്‍ഗം തന്നെ’ വിഷയത്തില്‍ മണ്ണുത്തി കോളെജ് ഓഫ് വെറ്ററിനറി ആന്‍ഡ് ആനിമല്‍ സയന്‍സ് കോളെജ് അസി. പ്രഫ. ഡോ. ജിത്ത് ജോണ്‍ മാത്യൂവും ‘മധുരം-മധുരം-മലയാളം’ വിഷയത്തില്‍ പയ്യന്നൂര്‍ മലയാളഭാഷാ പാഠശാല ഡയറക്ടര്‍ പി.പി ഭാസ്‌ക്കര പൊതുവാള്‍ സംസാരിക്കും.ക്ഷീരസംഗമത്തോടനുബന്ധിച്ചുള്ള പൊതു സമ്മേളനം തേവര്‍ക്കാട് കണ്‍വെന്‍ഷന്‍ സെന്റില്‍ ഡിസംബര്‍ ഒന്നിന് ഉച്ചയ്ക്ക് രണ്ടിന് ക്ഷീരവികസന -മൃഗസംരക്ഷണ-വനം വന്യജീവി വകുപ്പ് മന്ത്രി അഡ്വ.കെ.രാജു ഉദ്ഘാടനം ചെയ്യും. പട്ടികജാതി-പട്ടികവര്‍ഗ-പിന്നോക്ക ക്ഷേമ-നിയമ-സാംസ്‌ക്കാരിക- പാര്‍ലമെന്ററി കാര്യ വകുപ്പ് മന്ത്രി എ.കെ.ബാലന്‍ അധ്യക്ഷനാ കും. ജലവിഭവ വകുപ്പ് മന്ത്രി കെ.കൃഷ്ണന്‍കുട്ടി മുഖ്യപ്രഭാഷണം നടത്തും.പൊതുസമ്മേളനത്തില്‍ ജില്ലയിലെ മികച്ച ക്ഷീരകര്‍ ഷകനെയും വനിതാ ക്ഷീരകര്‍ഷകയേയും ആദരിക്കും. കൂടാതെ മികച്ച യുവകര്‍ഷകന്‍, മികച്ച പട്ടികജാതി, പട്ടികവര്‍ഗ വിഭാഗ കര്‍ഷകന്‍, മികച്ച ക്ഷീരസംഘം, മികച്ച ഗുണനിലവാരമുള്ള പാല്‍ സംഭരിച്ച ക്ഷീരസംഘം എന്നിവയെയും ആദരിക്കും. കന്നുകാലി പ്രദര്‍ശനത്തില്‍ ജേതാക്കളായ കന്നുകാലികള്‍, പ്രളയ ദുരിതാ ശ്വാസ പ്രവര്‍ത്തനങ്ങളില്‍ നിര്‍ണായക പങ്ക് വഹിച്ച ക്ഷീര സംഘങ്ങള്‍, സംഘടനകള്‍ എന്നിവയേയും ആദരിക്കും. ജില്ലയിലെ എം.പിമാര്‍, എം.എല്‍.എ മാര്‍, ജില്ലാ പഞ്ചായത്ത് പ്രസിഡന്റ്, ക്ഷീരവികസന വകുപ്പ് ഉദ്യോഗസ്ഥര്‍ എന്നിവര്‍ പങ്കെടുക്കും.