ഒറ്റപ്പാലം:വരോട്,കോതകുര്‍ശ്ശി,പത്തംകുളം ഭാഗങ്ങളിലുള്ള യുവാക്കളെ കേന്ദ്രീകരിച്ച് കഞ്ചാവ് വില്‍പ്പന നടത്തിയിരുന്ന യുവാവിനെ ഒറ്റപ്പാലം എക്‌സൈസ് റെയിഞ്ച് ഇന്‍സ്‌പെക്ടറും സംഘവും പിടികൂടി.പാവുക്കോണം സ്വദേശി കോട്ടപ്പള്ളിയാല്‍ മുഹമ്മദ് അനസ് (22) ആണ് പിടിയിലായത്.പ്രതിയില്‍ നിന്നും 1.300 കിലോ കഞ്ചാവ് കണ്ടെടുത്തു.കഞ്ചാവ് കടത്താന്‍ ശ്രമിച്ച സ്‌കൂട്ടറും കസ്റ്റഡിയിലെടുത്തു. വരോട് അത്താണിയില്‍ വാഹന പരിശോധന നടത്തി വരവെ എക്‌സൈസ് സംഘത്തിനെ വെട്ടിച്ച് പോയ പ്രതിയെ പിന്‍തുടര്‍ന്നാണ് പിടികൂടിയത്.ആന്ധ്രയില്‍ നിന്നും കിലോയ്ക്ക് 4000 രൂപ നിരക്കില്‍ കഞ്ചാവ് വാങ്ങി ചെറിയ പൊതികളാക്കിയാണ് പ്രതി വില്‍പ്പന നടത്തിയിരുന്നതെന്ന് എക്‌സൈസ് അറിയിച്ചു. പ്രതിയെ ഒറ്റപ്പാലം മജിസ്‌ട്രേറ്റ് കോടതിയില്‍ ഹാജരാക്കി. എക്‌സൈസ് ഇന്‍സ്‌പെക്ടര്‍ ബി.അന്‍ഷാദിന്റെ നേതൃത്വത്തില്‍ നടന്ന വാഹന പരിശോധനയില്‍ പ്രിവന്റീവ് ഓഫീസര്‍ ബഷീര്‍കുട്ടി സിവില്‍ എക്‌സൈസ് ഓഫീസര്‍മാരായ ആനന്ദ്, വിജയകുമാര്‍,സുധീഷ്.ആര്‍.നായര്‍,ഡ്രൈവര്‍ സാനി തുടങ്ങിയവര്‍ പങ്കെടുത്തു.