തൃത്താല: രാജ്യത്തെ ഗ്രാമീണ സ്ത്രീസംരഭകരുടെ ഏറ്റവും വലിയവ്യാപാരോത്സ വമായ ദേശീയ സരസ് മേളയ്ക്ക് ചാലിശ്ശേരി ഒരുങ്ങി. മുലയംപറമ്പ് മൈതാനത്തും സമീപത്തും ക്രമീകരിച്ചിട്ടുള്ള പ്രത്യേകവേദിയില് ജനുവരി രണ്ട് മുതല് 11വരെയാണ് മേളനടക്കുക. ചരിത്രത്തിലാദ്യമായാണ് ദേശീയസരസ് മേളയ്ക്ക് ഗ്രാമം ആതിഥേയ ത്വം വഹിക്കുന്നത്.
കേരളം ഉള്പ്പെടെ 28 സംസ്ഥാനങ്ങളില് നിന്നും എട്ട് കേന്ദ്രഭരണ പ്രദേശങ്ങളില് നിന്നും ഉള്ള 250 പ്രദര്ശന വിപണന സ്റ്റാളുകളില് കരകൗശലവസ്തുക്കള്, ആഭരണങ്ങള്, തുണിത്തരങ്ങള്, ഗൃഹോപകരണങ്ങള്, നിത്യോപയോഗ സാധനങ്ങള് തുടങ്ങി വിവിധ ഉത്പന്നങ്ങളുടെ പ്രദര്ശനവും വില്പനയുമുണ്ടാകും.കേരളത്തിലേയും ഇതര സംസ്ഥാന ങ്ങളിലെയും രുചിവൈവിധ്യം വിളമ്പുന്ന 30ലധികം സ്റ്റാളുകള് അടങ്ങുന്ന മെഗാ ഇന്ത്യന് ഫുഡ്കോര്ട്ട്, പ്രശസ്തമായ കലാകാരന്മാരും കലാകാരികളും അണിനിരക്കുന്ന സംഗീത നൃത്തനിശകള് പ്രാദേശിക കലാകാരന്മാരുടേയും കലാകാരികളുടേയും കുടുംബശ്രീ അംഗങ്ങളുടെയും വൈവിധ്യമാര്ന്ന കലാവിഷ്ക്കാരങ്ങള്, തൃത്താല മണ്ഡലത്തിലെ പ്രഗത്ഭ വ്യക്തിത്വങ്ങളെ ആദരിക്കുന്ന ആദരസന്ധ്യകള്, വിവിധ വിഷയങ്ങളില് സെമിനാറുകള്, പുഷ്പമേള, ഹാപ്പിനെസ് കോര്ണര് തുടങ്ങിയവയും ഉള്ക്കൊള്ളിച്ചിട്ടുണ്ട്.
വെള്ളിയാഴ്ച വൈകിട്ട് നാലരക്ക് മുഖ്യമന്ത്രി പിണറായി വിജയന് മേള ഉദ്ഘാടനം ചെയ്യും. മന്ത്രി എം.ബി രാജേഷ് അധ്യക്ഷനാകും.നിയമസഭാ സ്പീക്കര് എ.എന് ഷംസീര് വിശിഷ്ടാതിഥിയാകും.മന്ത്രി കെ.കൃഷ്ണന്കുട്ടി,എം പിമാരായ അബ്ദുള് സമദ് സമദാനി, വി കെ ശ്രീകണ്ഠന് എന്നിവര് മുഖ്യാതിഥികളാകും.സരസ് മേളയുടെ വരവറിയിച്ച് ഉച്ചയ്ക്ക് രണ്ടിന് വിളംബര ഘോഷയാത്ര നടക്കും. വാദ്യഘോഷ അകമ്പടിയോടെ ചാലിശ്ശേരി അന്സാരി കണ്വെന്ഷന് സെന്ററില് നിന്നും ആരംഭിക്കുന്ന ഘോഷയാത്രയില് ആയിരങ്ങള് അണിനിരക്കും. വിവിധ സി ഡി എസ് അംഗങ്ങളുടെ നാടന് കലാരൂപങ്ങളും ഘോഷയാത്രയുടെ ഭാഗമാകും.
വിവിധ ദിവസങ്ങളിലെ സാംസ്കാരിക സമ്മേളനങ്ങള് മന്ത്രിമാരായ പി.എ മുഹമ്മദ് റിയാസ്, കെ.രാജന്, സജി ചെറിയാന്, ആര് ബിന്ദു, പി.രാജീവ്, പി.പ്രസാദ്, വി.അബ്ദുറഹിമാന് എന്നിവര് ഉദ്ഘാടനം ചെയ്യും.സമാപന സമ്മേളന ഉദ്ഘാടനം ജനുവരി 11 വൈകിട്ട് ആറിന് ധനകാര്യ വകുപ്പ് മന്ത്രി കെ.എന് ബാലഗോപാല് നിര്വഹിക്കും.കെ.രാധാകൃഷ്ണന് എം.പി., സിനിമാതാരം മഞ്ജു വാരിയര് എന്നിവര് മുഖ്യാതിഥികളാകും. ജില്ലയിലെയും സമീപ ജില്ലയിലെയും എം.എല്.എമാര് വിവിധ ദിവസങ്ങളിലായി മേളയില് പങ്കെടുക്കും.
About the Author
