രജിസ്റ്റര്‍ ചെയ്തത് 108 എന്‍.ഡി.പി.എസ് കേസുകള്‍
മണ്ണാര്‍ക്കാട് : പാലക്കാട് ജില്ലയില്‍ എക്സൈസിന്റെ നേതൃത്വത്തില്‍ ലഹരി പരിശോ ധന ഊര്‍ജിതമായി പുരോഗമിക്കുന്നു. ഫെബ്രുവരി മാസത്തിലും മാര്‍ച്ച് 17 വരെയും 108 എന്‍.ഡി.പി.എസ് കേസുകളാണ് രജിസ്റ്റര്‍ ചെയ്തിരിക്കുന്നത്. ഇത്രയും കേസുകളിലായി 100 പേരെയാണ് എക്സൈസ് അറസ്റ്റ് ചെയ്തിരിക്കുന്നത്. 181.795 കിലോ ഗ്രാം കഞ്ചാവ്, നാല് കഞ്ചാവ് ചെടി, 35.500 ഗ്രാം ഹാഷിഷ്, 10.600 ഗ്രാം എം.ഡി.എം.എ, 166.022 ഗ്രാം മെ ത്തഫെറ്റമിന്‍, 21.800 അല്‍പ്രസോളം, 14800.00 ഗ്രാം കഞ്ചാവ് ചോക്ലേറ്റ്, 2.2 ഗ്രാം നൈട്രോ സെഫാം ഗുളികകളും എന്നിങ്ങനെയും ഇക്കാലയളവില്‍ പിടികൂടിയിട്ടുണ്ട്. 1,707 പരിശോധനകളാണ് എക്സൈസിന്റെ നേതൃത്വത്തില്‍ ഇക്കാലയളവില്‍ നടത്തിയത്. 41 റെയ്ഡുകള്‍ മറ്റ് വകുപ്പുകളുമായി സഹകരിച്ചും നടത്തി.
266 അബ്കാരി കേസുകളിലായി 222 പേരെയാണ് അറസ്റ്റു ചെയ്തത്. 14 വാഹനങ്ങളും കസ്റ്റഡിയിലെടുത്തു. 867 കോട്പ കേസുകളും ജില്ലയില്‍ രജിസ്റ്റര്‍ ചെയ്തിട്ടുണ്ട്. ഇത്രയും കേസുകളിലായി 847 പ്രതികളാണ് ഉള്‍പ്പെട്ടിട്ടുള്ളത്. ഇവരില്‍നിന്നും 173,400 രൂപ പിഴ ഈടാക്കി. കോട്പ നിയമപ്രകാരം 416.795 കിലോ നിരോധിത പുകയില ഉല്‍പന്നങ്ങള്‍ പിടിച്ചെടുത്തു. 289 ലിറ്റര്‍ ചാരായം, 52.19 ലിറ്റര്‍ അന്യസംസ്ഥാന മദ്യം, 837.925 ലിറ്റര്‍ മദ്യം, 1,534 ലിറ്റര്‍ കള്ള്, 11,399 വാഷ്, 7.800 ലിറ്റര്‍ ബിയര്‍, 27 ലിറ്റര്‍ അരിഷ്ടം എന്നിവയും പിടികൂടി. ഇതിനുപുറമേ ബസ് സ്റ്റാന്‍ഡുകള്‍, റെയില്‍വേ സ്റ്റേഷനുകള്‍, ബാറുകള്‍, കള്ള് ഷാപ്പുകള്‍, ലേബര്‍ ക്യാമ്പുകള്‍, വിദ്യാലയങ്ങളുടെ പരിസരം, തെങ്ങിന്‍ തോട്ടങ്ങള്‍ എന്നിവിടങ്ങളിലും എക്സൈസിന്റെ നേതൃത്വത്തില്‍ പരിശോധന നടത്തുന്നുണ്ട്.
