കോട്ടോപ്പാടം: ദേശീയ കായിക ദിനാചരണത്തിന്റെ ഭാഗമായി തിരുവിഴാംകുന്ന് സി.പി.എ.യു.പി സ്‌കൂളില്‍ ക്രോസ് കണ്‍ട്രി സംഘടിപ്പിച്ചു. മുപ്പതോളം വിദ്യാര്‍ഥികള്‍ പങ്കെടുത്തു. ഒളിമ്പ്യന്‍ പി. കുഞ്ഞുമുഹമ്മദ് ഫ്‌ളാഗ് ഓഫ് ചെയ്ത് ഉദ്ഘാടനം ചെയ്തു. ഇന്ത്യന്‍ ഹോക്കിയെ ലോകത്തിന്റെ നെറുകയില്‍ പ്രതിഷ്ഠിച്ച ധ്യാന്‍ചന്ദ് എന്ന ഹോക്കി മാന്ത്രികനോടുള്ള ആദരസൂചകമായാണ് അദ്ദേഹത്തിന്റെ ജന്മദിനമായ ആഗസ്റ്റ് 29 ഇന്ത്യയില്‍ ദേശീയ കായിക ദിനമായി ആചരിക്കുന്നത്. പി.ടി.എ പ്രസിഡന്റ് സുഭാഷ് ചന്ദ്രന്‍ അധ്യക്ഷനായി. മാനേജര്‍ സി.പി ഷിഹാബുദ്ദീന്‍, കായികാധ്യാപകന്‍ കെ. റാഫത്ത്, പി. അബ്ദുള്‍ കരീം, നിയാസ് ബാബു, പി. റഷീദ് തുടങ്ങിയവര്‍ സംബന്ധിച്ചു.
