തച്ചമ്പാറ: ഗ്രാമ പഞ്ചായത്ത് അഞ്ചാം വാര്‍ഡ് ഉപതെരഞ്ഞെടുപ്പില്‍ 82.34 ശതമാനം പോളിംങ് രേഖപ്പെടുത്തിയതായി വരണാധികാരി അറിയിച്ചു. മുതുകുര്‍ശ്ശി കെ.വി. എ.എല്‍.പി. സ്‌കൂളിലാണ് വോട്ടെടുപ്പ് നടന്നത്. രാവിലെ ഏഴ് മണിയോടെ ആരംഭിച്ച വോട്ടെടുപ്പ് ആറുമണിയോടെ അവസാനിച്ചു. 1303 വോട്ടര്‍മാരില്‍ 1076 പേര്‍ വോട്ട് രേഖപ്പെടുത്തി. എല്‍.ഡി.എഫ്. സ്ഥാനാര്‍ഥി യായി പി.ആര്‍.സന്തോഷ്, യു.ഡി.എഫ്. സ്ഥാനാര്‍ഥിയായി നൗഷാദ് ബാബു, ബി.ജെ.പി. സ്ഥാനാര്‍ഥിയായി ജോര്‍ജ് തച്ചമ്പാറ എന്നിവരാണ് മത്സരിക്കുന്നത്. വോട്ടെണ്ണല്‍ ബുധനാഴ്ച രാവിലെ 10 മണിക്ക് പഞ്ചായത്ത് ഹാളില്‍ നടക്കും. അഞ്ചാം വാര്‍ഡ് മെമ്പറായിരുന്ന പി.സി.ജോസഫിന്റെ നിര്യാണ ത്തെ തുടര്‍ന്നാണ് ഉപതെരഞ്ഞെടുപ്പ് വേണ്ടി വന്നത്.
