മണ്ണാര്‍ക്കാട്: വിസ്ഡം സ്റ്റുഡന്റ്‌സ് പാലക്കാട് ജില്ലാ സമിതി ഹയര്‍സെക്കന്ററി വിദ്യാര്‍ഥികള്‍ക്കായി സംഘടിപ്പിക്കുന്ന ‘ടീന്‍സ്‌പേസ് സെക്കന്ററി സ്റ്റുഡന്റ്‌സ് കോണ്‍ഫറന്‍സ്’ ഓഗസ്റ്റ് 18 ന് കാഞ്ഞിരപ്പുഴയില്‍ വെച്ച് നടക്കും. സമ്മേളനത്തിന്റെ പ്രഖ്യാപന സമ്മേളനം അഡ്വ. എന്‍. ഷംസുദ്ദീന്‍ എം.എല്‍.എ ഉദ്ഘാടനം ചെയ്തു. വിസ്ഡം സ്റ്റുഡന്റ്‌സ് പാലക്കാട് ജില്ലാ പ്രസിഡന്റ് എം മുഹമ്മദ് ഷാഹിന്‍ഷാ അധ്യക്ഷനായി.
സംസ്ഥാന വൈസ് പ്രസിഡന്റ് നൂറുദ്ദീന്‍ സ്വലാഹി, പാലക്കാട് ജില്ലാ സെക്രട്ടറി റിഷാദ് പൂക്കാടഞ്ചേരി, മുജീബ് സലഫി, എന്‍.എം ഇര്‍ഷാദ് അസ്ലം, അഷ്‌റഫ് അല്‍ ഹികമി, സാജിദ് പുതുനഗരം, സുല്‍ഫീക്കര്‍ പാലക്കാഴി, ഷഹീര്‍ അല്‍ ഹികമി, ഷാനിബ് അല്‍ ഹികമി, സഫീര്‍ അരിയൂര്‍, സനീര്‍ അല്‍ ഹികമി, മുബാറക് തച്ചമ്പാറ, ഇര്‍ഫാന്‍ ചെറുപ്പുളശ്ശേരി, ഹസീബ് പാലക്കാട് എന്നിവര്‍ സംസാരിച്ചു.
സമ്മേളനത്തിന്റെ ഭാഗമായി സ്‌കൂളുകള്‍ കേന്ദ്രീകരിച്ച് ലഹരി വിരുദ്ധ സദസ്സുകള്‍, ശാഖാ തലങ്ങളില്‍ ടീന്‍സ്‌ടോക്ക് വിദ്യാര്‍ത്ഥി സംഗമങ്ങള്‍, സായാഹ്ന പ്രഭാഷണങ്ങള്‍, ഓണ്‍ലൈന്‍ മത്സരങ്ങള്‍, കൗണ്‍സിലിങ് ഡസ്‌ക്, മണ്ഡലം തല വിദ്യാര്‍ത്ഥി സംഗമങ്ങള്‍, ജില്ലാ നേതൃസംഗമങ്ങള്‍ എന്നിവ സംഘടിപ്പിക്കും.
